Suid-Afrikaanse veeprodusente kry te doen met voortdurend veranderende omgewings, waaronder politieke, maatskaplike, ekonomiese en fisiese veranderings. Vinnige wetenskaplike en tegnologiese ontwikkelings kan ook beskou word as ’n groot bedreiging, kwessie of iets wat benut kan word.
Dr. Japie van der Westhuizen, hoofbestuurder van Stamboek SA, meen boere wat die seminaar bywoon, moet hulself oopstel vir kennis en insig oor al die onderwerpe wat bespreek gaan word. “Dan is die kans baie beter dat jy veerkragtig gaan wees, teenoor iemand wat net op sy eie aankarring met sy ou manier van doen. Wees oop vir nuwe idees, wend nuwe tegnologie aan, luister vir die mense wat ervaring en kennis het.”
Die opwindende deelname van die besigheidskool aan die Noordwes-Universiteit se Agri Indaba het die belofte van oop debat en die uitruil van idees om planne te vorm op die pad van veerkragtigheid.
Getrou aan Stamboektradisie sal die kundiges hul ervaring en kennis oordra oor die nuutste ontwikkelings wat beskikbaar is vir telers, produsente en besluitnemers in die veebedryf.
"Dit is die ideale geleentheid om na ware kundiges op hul gebied te luister, mense met die regte agtergrond en uitgebreide ervaring. Dit is ook ’n geleentheid om by te dra en by mekaar te leer,” sê Japie.
Vir diegene wat nie met hul mede-veeprodusente kan skouers skuur en R300 kan betaal nie (drankies en ’n ligte middagete ingesluit), word die geleentheid geskep om gratis aanlyn aan te sluit. Klik hier om dit aanlyn by te woon.
"Ek dink een van die belangrike boodskappe wat ek graag met die seminaar sal wil oordra, is dat hoewel ons ideologies van mekaar kan verskil, moet ons gesamentlik en as ’n eenheid veerkragtig wees as ons ekonomies wil oorleef," se Japie.
“Die hoofdoel van die seminaar sal wees om die onderliggende hoekstene te bekyk om veerkragtigheid te verseker wat hierdie probleme die hoof kan bied.”
Die inleidende video vir die seminaar kan op YouTube gekyk word.
Registrasie
Die beste opsie is om op 30 April by Monte Bello Estate, Bloemfontein, te wees om van 07:45-08:30 te registreer. SA Stamboek is tans besig om ’n aanlyn fasiliteit op te rig om vooraf te bespreek en te betaal, maar diegene wat wil seker maak dat hulle dit nie misloop nie, kan Elsa van den Berg kontak by elsa@studbook.co.za, 051 410 0970.