Die polisie het Saterdagnag afgekom op die lyke van Christo Morrison (76) en sy vrou, Christa (73), wat oop wonde aan die boonste dele van hul liggame gehad het.
’n Bekommerde buurman wat die Morrisons sedert Vrydag nie op hul selfone kon bereik nie, het die polisie Saterdag gevra om ondersoek te gaan instel.
Volgens ’n verklaring deur die kantoor van die provinsiale kommissaris het die polisie met hul aankoms gesien dat die deure van die plaashuis oopstaan. Daar was bloed op die vloere en die egpaar was nie in die deurmekaar huis nie. Dit wou voorkom of iemand na goedere gesoek het.
’n Multidissiplinêre aksieplan is onmiddellik ingestel en ’n soektog na die egpaar is begin.
Sers. Mahlomola Kareli, polisiewoordvoerder, sê Morrison se lyk is sowat 300 m van die plaashuis af gevind en sy vrou se lyk is in ’n septiese tenk opgespoor. Beide is op die toneel dood verklaar.
Terwyl die soektog nog aan die gang was, is hul Toyota Land Cruiser naby Majwemasweu by Brandfort gevind. Gereedskap en elektroniese toerusting is uit die plaashuis gesteel en die Glen-polisie ondersoek sake van huisroof en moord.
’n Soektog na die moordenaars is aan die gang maar tot dusver is niemand nog in hegtenis geneem nie. Netwerk 24 het verneem dat verdagtes reeds Sondag ondervra is.
Skerp veroordeel
Dr. Jane Buys, veiligheidsrisiko-analis van Vrystaat Landbou, sê die grusaamheid van só ’n aanval kan hoegenaamd op geen manier geregverdig word nie, ongeag wat enige persoon teenoor ’n ander dalk doen of sê. “Selfs nadat ek 19 jaar in die polisie was, kon ek nog nooit hierdie tipe wreedheid verstaan nie. Ons moet dit ten sterkste veroordeel.”
Sy sê die inligting kom nog drupsgewys in en dit is nog nie duidelik wat alles geroof is nie. Uit die inligting tot dusver blyk dit dat die moontlikheid van ’n persoonlike verbintenis moontlik kan bestaan – iemand wat voorheen dalk op die plaas gewoon of gewerk het.
“Ons kan net hoop en glo dat die polisie alle moontlike inligting sal opvolg, dat inhegtenisnemings en suksesvolle vervolgings daaruit sal voortspruit en swaar vonnisse by skuldigbevinding opgelê sal word.”
Jan van Niekerk, provinsiale leier van die VF Plus in die Vrystaat, het ook die moord ten sterkste veroordeel. Hy sê in ’n verklaring plaasaanvalle en -moorde is anders as huisbrake en roof in stedelike gebiede – veral weens die geweld en onmenslikheid wat daarmee gepaardgaan.
Volgens hom word dit deur die politieke retoriek van die ANC en die EFF aangeblaas, en die VF Plus beskou die geweld in hierdie aanval as wreedaardig en onnodig.
“Dit is een van vele gevalle wat wys dat die regering nie oor die politieke wil beskik om hierdie soort misdaad te bekamp nie.
“Veiligheidsnetwerke moet versterk word sodat aanvalle soos dié voorkom kan word. Die reaksie van die polisie moet van só ’n aard wees dat dit as afskrikmiddel vir aanvallers dien.”
Van Niekerk sê die VF Plus spreek sy innige simpatie uit met die familie en geliefdes van die Morrison-egpaar wat nie verdien het om deur hierdie verskriklike hartseer te gaan nie.
Die DA het ook sy medelye betuig met die naasbestaandes van die Morrison-egpaar en gesê die ontstellende toename in geweldsmisdade in die provinsie kan aan die swak uitvoering van die ANC-beleid oor polisiëring toegeskryf word.
Roy Jankielsohn, kandidaat vir die provinsie se premierskap, het gesê die nasionale regering se onvermoë om misdaad hok te slaan kan nie net aan maatskaplik-ekonomiese faktore toegeskryf word nie. “Die regering hou vol om te beding vir ’n gesentraliseerde nasionale polisiemag terwyl die DA ’n gedesentraliseerde polisiemag wil sien wat plaaslik verantwoording moet doen. Dit sal wetstoepassing nader aan gemeenskappe bring met strategieë wat op eiesoortige plaaslike probleme gemik is.”
Hy het daarop gewys dat sowat 75 Suid-Afrikaners daagliks vermoor word terwyl daar ’n altyd teenwoordige risiko van diefstal, moord of verkragting op straat is, en daar is min vertroue in die polisie om die land se burgers te beskerm.
Jankielsohn het gesê die DA sal landelike gemeenskappe teen misdade, wat plaasaanvalle en -moorde insluit, beskerm deur onder meer pasgemaakte landelike veiligheidsplanne in ál die provinsies met voldoende finansiering om dit te implementeer, die skep van landelike veiligheidseenhede, landelike radionetwerke, die versterking van die vermoë van eenhede teen veediefstal en deur hom te beywer vir wetgewing wat grondbesetting kriminaliseer en voorkom.
Enigiemand met inligting word gevra om kol. Ben Bolsiek by 082 466 8530 te bel.