Met die klem op prestasietoetsing en aanpasbaarheid behaal die Advocate-stoetery van regter Callie Cillié en sy dogter, Erina Cillié-Du Preez, deurlopend sukses in die Sussex-bedryf. Cillié, wat intussen sy regstoga opgehang het, en sy steunpilaardogter wy hulle die afgelope bykans drie dekades aan fieterjasievrye stoetteling.
Die stoetery word ongeveer 30 km noord van Bloemfontein aan die Modderrivier bedryf. Tef word vir wintergebruik geplant om hooi vir die speenverse te produseer. Die stoet wei uitsluitlik op rooigrasveld met slegs ’n standaardlek in die somer en winter.
Geen bees word gepamperlang nie en hulle kan dus oral aanpas. Dit geld ook die stoetery se Elitekoei, CC 130032, wat in geen opsig anders as die ander koeie in die stoetery behandel word nie. Buiten haar vrugbaarheid en bogemiddelde moedereienskappe het sy ook die groeivermoë om swaar kalwers te speen.
