Mielies is tans die tweede grootste Suid-Afrikaanse landbou-uitvoerproduk. Ondanks beperkings soos gebrekkige hawe-uitvoerinfrastruktuur en geen staatsteun die afgelope twee dekades nie, is dit ’n groeiende bedryf.
Sowat ’n kwart van die jaarlikse produksie word na ’n verskeidenheid bestemmings uitgevoer. Die data toon die onverwerkte mielie-uitvoer én verwerkte mielieprodukte wat uitgevoer word. Na verwagting sal 420 000 ton witmielieprodukte, meestal mieliemeel, vanjaar uitgevoer word na onder meer die Demokratiese Republiek van die Kongo en ander lande in Suider-Afrika.
In die geval van geelmielies is verwerkte produkte van 128 000 ton by die syfers ingesluit. Die sowat 550 000 ton per jaar moet gesien word as plaaslike waardetoevoeging wat ekstra werk in Suid-Afrika by mielieverwerkers skep en die ekonomie verder bevoordeel.