Bednar-swaardienswerktuie help boere landwyd om produktiewer, winsgewender en sommer lekkerder te boer. Die goeie nuus is dat BHBW sy Bednar-reeks uitgebrei het met ’n nuwegenerasie-tandwerktuig en ’n fynsaadplanter wat ongeëwenaarde ontwerpvoordele bied.
Op Nampo kan besoekers met die BHBW-span gesels oor hierdie en ander Bednar-produkte, asook die jongste Geringhoff- en Crary-strooptegnologie, Yale-vurkhysers, nywerheidskoonmaaktoerusting van Hako en ’n volledige reeks egte en vervangingsonderdele.
Nuwe Bednar-werktuie
Bednar se veeldoelige Fenix FO Profi-grondbewerker is beskikbaar met werkwydtes van 4-7,9 m, en blink uit met vlak én diep bewerking (tot 35 cm). Dit het ’n swaardiensraam en vier rye hidroulies beskermde tande wat in ’n V-formasie gerangskik is om trekweerstand en kragvereistes te verminder.
Die parallelogram-ontwerp van die rollers sorg dat dieselfde druk oor die breedte van die werktuig toegepas en grondkontoere outomaties gevolg word. Daarby verseker Bednar se geïntegreerde agteras (een ry tande is agter die as geplaas) ’n eweredige gewigverspreiding sodat die Fenix deurentyd in ’n reguit lyn werk, ’n kleiner draaisirkel benodig en makliker vervoer word.
Bednar behaal wêreldwyd sukses met sy Omega-fynsaadplanters, en die eerste planter is nou ook in die Noord-Kaap verkoop. Dié lugdrukplanters se saad- en kunsmistenke, wat onder druk werk, sorg vir die akkurate uitmeet van saad en kan hoë volumes kunsmis hanteer.
Die skottels wat die bogrond losmaak, is in Bednar se stabiele X-Precise-patroon gerangskik sodat die planter die hele tyd presies agter die trekker loop, ook teen ’n hoë plantspoed. ’n Stel wielrollers maak die grond perfek gelyk nadat dit voorberei is. Die fynsaadkouters is in ’n parallelogrampatroon gemonteer sodat grondkontoere outomaties gevolg word vir presiese saadplasing op ’n eenvormige diepte.
Die groot nuus is dat BHBW alle boere wat van Februarie tot September vanjaar ’n Bednar- werktuig koop, nooi om dié vervaardiger volgende jaar in Tsjeggië te besoek.
Geringhoff
BHBW het in 2023 ’n rekordjaar vir die verkoop van Geringhoff-strooptafels behaal, ook danksy sy klem op naverkopediens. BHBW bemark en rugsteun sy Geringhoff-reeks landwyd met tegniese verteenwoordigers wat help verseker dat oestyd vlot verloop, en handhaaf ’n hoë beskikbaarheid van onderdele.
BHBW verskaf ’n volledige reeks Geringhoff-tafels – MS-mielieplukkerkoppe (vasteraam en opvoubaar) in elke moontlike rywydte met opsies soos sonneblom-kits; TruFlex-Draper-tafels vir sojabone en koring; en Sunlite-sonneblomtafels. ’n Tweejaar-waarborg geld vir alle nuwe Geringhoff-tafels.
Op Nampo word ’n 20 ry 30 vt.-opvoubare MS-plukkerkop vertoon en teen ’n spesiale prys aangebied. Daar sal ook ’n Truflex 35 vt.-Drapertafel op die standplaas te sien wees.
Crary
Die Crary-windstelsel vir kleingraan werk só goed dat dit in droë jare die moeite werd is om te oes. Dié stelsel lewer eweredige hoëspoed-lugvloei op die snylem van die strooptafel sodat meer materiaal ingevoer en graanverliese beperk word. Dit het reeds sy staal in Suid-Afrika gewys. In Noordwes getuig sojaboonboere byvoorbeeld van pitverlies van minstens 100-150 kg per hektaar wat voorkom is. Die Crary-windstelsel kan op tafels van alle bekende fabrikate gepas word. Die voordele van dié stelsel word op Nampo prakties gedemonstreer.
Onderdele
BHBW se sake-eenheid Temo Parts verskaf ’n uitgebreide reeks onderdele vir haas elke toepassing en fabrikaat op die mark. Onder die bekende handelsname wat deur Temo verteenwoordig word, tel Tee- Jet-spuitstukke en filters van Mann+Hummel.
Yale en Hako
Met Yale bied BHBW ’n vurkhyser vir elke moontlike behoefte en sak, waaronder elektriese modelle vir pakhuise en veeldoelige, kostedoeltreffende opsies wat ideaal vir plaaswerk is. Nuwe of gebruikte vurkhysers kan ook gehuur word.
BHBW verskaf nywerheidskoonmaaktoerusting van Hako in Duitsland. Verskeie outomatiese vloerwas- en veemasjiene is beskikbaar vir binne- én buitenshuise gebruik.
