Besoekers aan die 56ste Nampo-oesdag kan gerus maar hul sambrele saambring, want donderstorms met ligte neerslae word vir 14 en 15 Mei in die distrik van Bothaville voorspel.
Weermodelle dui tans dat slegs ligte reën verwag word en dat dit nie aanhoudend gaan val nie, maar eerder gedurende die donderbuie sal val. Besoekers en uitstallers moet vir dié twee dae hul sambrele byderhand hou. Hoewel die gemiddelde windsnelhede vir volgende week laag is, sê Johan van den Berg, onafhanklike landbouweerkundige, kan rukwinde tydens die donderstorms voorkom.
Abnormale hitte vir dié tyd van die jaar sal vandeesweek in groot dele van die land ondervind word, en in dele in onder meer die Vrystaat en die Noord-Kaap sal maksimum temperature van tussen 30 °C en 35 °C of selfs hoër kan voorkom.
Skerp daling in temperature
Die temperature sal na verwagting vanaf 13 Mei skerp daal. Dagtemperature kan met tussen 5 °C en 8 °C daal in die week van 13 tot 17 Mei, veral rondom Dinsdag 14 Mei wanneer die dagtemperature tot net bo 20 °C by Bothaville kan daal.
Die nagtemperature sal tot onder 5 °C daal en dit sal die koudste rondom 15, 16 en 17 Mei wees. Ligte ryp is ook volgende week moontlik. Van den Berg sê daar moet in ag geneem word dat temperature van 5 °C by ’n weerstasie, waar die temperatuur op ’n hoogte van tot 1,2 m gemeet word, op die grondoppervlak reeds tot by vriespunt kan daal. Grasbedekkings kan ook veroorsaak dat temperature nog laer daal as op kaal gekompakteerde grond kan daal.
Die nagte gaan dus redelik koud wees in die omgewing van Bothaville. Moet dus nie jou baadjie by die huis los as jy Nampo toe gaan nie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.