Pieter-Louw van der Merwe van Driehoek-boerdery buite Reitz in die Vrystaat het twee jaar gelede as gr.11-leerling ’n plan bedink om vleisbraai ’n bietjie makliker te maak. ’n Jaar later het hy sy Hardekool-roosters vir die Landbouweekblad-boereplannekompetisie op die Nampo-oesdag ingeskryf.
Hy is vandag ’n eerstejaarstudent aan Vrystaat Landbou in Bloemfontein en verkoop steeds sy roosters.
“Ek wil boer, maar ek is ook baie sakegerig” sê Pieter-Louw, wat saam met sy ma, Celeste, met mielies, sojabone, beeste en skape boer.
“Ek het met skape begin. Dit het my die kapitaal gegee vir ander goed, en toe begin ek die roosters maak.”
In die video vertel Pieter-Louw hoe sy rooster gebruik kan word om oor verskillende hitte te braai en om selfs ’n vleisbak op te sit om die kos warm te hou. Dit is geskik vir enige plek waar jy wil braai – van jou braaistoep tot langs ’n dam of in die veld.
Die Boereplanne-kompetisie was vir hom ’n uitstekende bemarkingsgeleentheid.
“Baie voete loop verby en daar is baie oë op jou produk. Ek het my sakekaartjie by die produk neergesit en hoewel ek nie gewen het nie, het ek baie meer braai-staanders daardie maand verkoop.
“Ek raai boere aan om in te skryf vir die kompetisie, nie net vir die prysgeld nie, maar ook vir die bemarkingsgeleentheid wat daarmee saamgaan.”
Skryf jou plan in
Maak ’n plan en skryf nog betyds jou boereplan vir vanjaar se Nampo-oesdag op Bothaville in. R50 000 is op die spel.
Dit kan enige toerusting wees wat aangewend kan word om probleme op ’n plaas aan te pak. Deelnemers kan in ses afdelings inskryf.
Vanjaar is ook plek gemaak vir produkte wat reeds kommersieel beskikbaar is. Hoewel die prysgeld nie in dié kategorie van toepassing is nie, gaan die wenner ’n gratis uitstalruimte van 10 m x 10 m op Nampo-2025 losslaan.
Om die inskrywing van die planne makliker te maak, word video-inskrywings aanvaar om boere te help vir wie dit moeilik is om hul inskrywing in Bothaville te kry.