Kundige, indringende navorsing oor aangeleenthede wat gewone mense se welstand raak, is immers ons beste skans teen onbesonne beleidsbesluite wat almal kan benadeel.
Daarom was Manie teleurgesteld in dr. Neva Makgetla, ’n senior navorser by die invloedryke dinkskrum Trade & Industrial Policy Strategies (Tips), se aanvegbare kritiek op die pluimvee- en suikermeesterplan in ’n onlangse meningstuk in Business Day. “Die regering moet sy pogings om dinosourusse te red, heroorweeg,” lui die opskrif.
Ofskoon sy tereg klappe uitdeel na die twee gróót dinosourusse wat tans Suid-Afrika se vooruitgang sink – Eskom en Transnet – meen sy die meesterplanne vir pluimvee en suiker is ewe problematies as die miljarde se belastinggeld wat oor dekades vergeefs in dié twee staatsondernemings gestort is.