Die Nasionale Verbruikerskommissie (NVK) het verbruikers verlede maand spesifiek daarteen gewaarsku om in virtuele varke op ’n virtuele plaas, soos bemark deur die onderneming Piggy Farm Trading, te belê. Die kommissie ondersoek hierdie onderneming se bedrywighede ná klagtes van verbruikers.
Kort hierna het die Nasionale Vervolgingsgesag (NVG) op 8 April ’n bewaringsbevel van meer as R4,3 miljoen in die hooggeregshof in Pretoria gekry om die bankrekening van Piggy Farm, waarin meer as R16 miljoen in Februarie was, te bevries.
Die NVK meen die virtuelevarkeskema lyk na ’n sogenoemde vermenigvuldigingskema, en volgens die NVG het dit die kenmerke van ’n klassieke Ponzi-skema.
