Katoen – ’n wengewas op droëland wanneer die reën wegbly en ander gewasse verdor – kan ook kwesbaar wees as daar baie reën en bewolkte toestande tydens bolbars en in die plukstadium is.
Die blootstelling aan verskillende weer-elemente kan ook die graad van witheid nadelig beïnvloed en laer grade (grys katoen) tot gevolg hê.
Oor die onlangse reën sê dr. Annette Bennett, uitvoerende hoof van Katoen SA, dat produsente dit verwelkom, en ondanks moontlike laer gehalte kan ’n oes afgehaal word. “Vanuit hierdie oogpunt bly katoen jou uitstaande droëlandgewas maar jy kry optimale potensiaal onder besproeiingstoestande wanneer vog op die verkose tye toegedien word.”
Sy het in reaksie op die jongste oesskatting gesê vergeleke met ander somergewasse vaar katoen nog relatief goed in die droë dele en sy hoop boere daar besef opnuut die waarde van katoen. Dit is hoofsaaklik vanweë ’n diep wortelstelsel wat die plant help om vog dieper te gaan haal.
Afname in skatting
Volgens Katoen SA se maandverslag vir Maart is die geraamde aanplantings vir die 2023-’24-seisoen nou 16?176 ha teenoor die vorige seisoen se19 864 ha en die 17?835 ha wat in Januarie geraam is. In totaal aangeplant is 6?701 ha onder besproeiing en 9?475 ha op droëland. Die derde oesskatting vir die seisoen is nou 67 363 bale vesel teenoor verlede jaar se finale skatting in November van 80 225 bale.
Die derde skatting vir kleinskaalse produksie dui steeds op ’n totaal van 5 612 bale vesel, waarvan die meeste op die Makhathini-vlakte (3?966 bale), wat in 2024 geproduseer sal word. Daar word gewerk aan die uitbreiding van kleinskaalse produksie en ’n nuwe pluismeule vir die gebied word ná die volgende seisoen in die vooruitsig gestel om produksie aan te moedig.
Die regering beplan ook meer voorligtingsdienste, ook in ander areas soos Matlerekeng en Dennilton in Limpopo. Die mikpunt is om kleinskaalse produksie teen 2030 op sowat 20% van totale produksie te kry, teenoor 9% in hierdie stadium.
Wat winsgewendheid betref, het katoen steeds goeie ekonomiese potensiaal bo sommige ander gewasse onder beide droëland en besproeiingsomstandighede. Die New Yorkse aandelebeurs se prys, waarop Suid-Afrikaanse pryse gegrond word, was op 28 Maart op 83.91 Amerikaanse sent per pond (R35.14/kg). Die gemiddelde internasionale prys (Cotlook A-indeks) het die eerste week van April op 95,60 sent per pond gestaan.
Styging in pryse
Daar word verwag dat die wêreldprys effens in die 2024-’25-seisoen sal styg as gevolg daarvan dat die verbruik hoër as die produksie is. Indien die weersomstandighede ’n nadelige invloed op die oes gaan hê, kan dit ’n aansienlike verdere prysverhoging veroorsaak.
Volgens die markverslag was internasionale katoenverbruik die groot verrassing hierdie seisoen. Gegewe die swak ekonomiese omstandighede en ’n daling in verbruikersvertroue was die verwagting dat verbruik laag sou wees en dat produksie selfs aansienlik hoër as verbruik sou wees. Die verbruik is nou egter 80 000 ton meer as die produksie.
In die verslag word aangedui dat dit deels toegeskryf kan word aan ’n daling in inflasie in verskeie groot lande en meer stabiele internasionale markte wat verbruikersvertroue ’n hupstoot begin gee.
Indien dié neiging voortduur, kan dit groot voordeel vir die internasionale bedryf inhou. In hierdie stadium dui die voorspelling vir 2024-’25 ’n toename van 3% in aanplantings tot 32,85 miljoen ha wêreldwyd. Produksie sal na verwagting met 2,5% toeneem tot 25,22 miljoen ton, en verbruik met 2,9% tot 25,37 miljoen ton.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
