Die grootste probleem vir die 2024-seisoen was die beskikbare grondvog om betyds te kon plant in veral droëlanddele van Noordwes en Limpopo. In sommige gebiede moes daar weens droogte en hoë temperature oorgeplant word, en in ander dele kon daar nie geplant word nie.
Volgens Katoen SA se maandverslag vir Januarie is altesaam 17 838 ha vir die 2024-seisoen aangeplant, waarvan 6 896 ha onder besproeiiing is en 10 942 ha op droëland. Verlede jaar se totaal was 19 864 ha, waarvan 6 308 onder besproeiing was en 13 556 ha op droëland.
Die eerste oesskatting vir die nuwe seisoen is 68 423 bale vesel teenoor verlede jaar se finale skatting in November van 80 225 bale.
Dr. Annette Bennett, uitvoerende hoof van Katoen SA, sê goeie reën in die meeste gebiede sedert begin Januarie bring nuwe hoop vir die bedryf. “Die kwessie aan die einde van 2023 was om droëlandkatoen gevestig te kry, maar nou moet produsente daarop konsentreer om optimale veselgehalte te behaal.
“Ten spyte hiervan bly katoen ’n voorkeurgewas vir produksie onder droëlandtoestande. Wat winsgewendheid betref, het katoen goeie ekonomiese potensiaal onder droëland- én besproeiingsproduksie. Daar is egter steeds knelpunte weens die intensiteit waarmee katoen bestuur moet word, veral met droëlandproduksie, finansieringskwessies om inset- en plukkerkoste te dek, en ’n gebrek aan nuwe variëteite.”
Nuwe ontwikkelings
Nuwe ontwikkelings met betrekking tot die ontstaan van pluismeulens op die Sprinkgbokvlakte en in die Makopane- en Ubongwa-gebied, asook verdere moontlike ontwikkelings in die Nkomazi-gebied, kan kleinboere en kommersiële produksie volgens haar ’n hupstoot gee. Die bedryf glo met al die nuwe ontwikkelings sal produksie in die 2025-seisoen toeneem.
Die eerste skatting vir kleinskaalse produksie vir 2024 dui op ’n totaal van 3 966 bale vesel op die Mkahathini-vlakte, 1 849 bale in Mpumalanga, 11 bale by Rust de Winter en net 454 bale in Limpopo weens die laat reën. Die mikpunt volgens die meesterplan vir landbou en landbouverwerking is dat kleinskaalse produksie teen 2030 sowat 20% van die algehele produksie moet wees. In hierdie stadium is dit slegs sowat 9,2%.
In teenstelling met ander katoenproduserende lande waar regerings miljarde rande opdok om alle produsente geldelik te ondersteun, dra die Suid-Afrikaanse regering net sowat R21,9 miljoen by om kleinskaalse produksie in Limpopo, KwaZulu-Natal en Mpumalanga te ondersteun.
Die geld word deur Katoen SA aan verskaffers betaal vir saad, onkruiddoders, kunsmis, herstelwerk aan toerusting en vaardigingsontwikkeling vir kleinboere.
Wat gemiddelde internasionale katoenpryse (Cotlook A-indeks) betref, het dit die eerste week van Januarie op 91,25 Amerikaanse sent per pond gestaan, en die New Yorkse aandelebeurs se prys op 79, 21 sent per pond (R32,82/kg).
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
