Die Poggenpoel Molopo-Bonsmara-stoetery hou op 28 Mei om 11:00 sy jaarlikse produksieveiling by die Noord-Kaap Lewendehawe-veilingslokaal op Stella in die Noordwes. Altesaam 100 bulle, 15 uitsoek-stoetkoeie en 200 kommersiële diere in alle produksiestadiums gaan beskikbaar wees.
Kobus Poggenpoel en sy seuns, Kobus jr. en Phillip, stel jaarliks top-teelmateriaal aan die mark beskikbaar en vanjaar is geen uitsondering nie. Een hiervan is BBM 17-245 (lot 8). Dié bul is een van die laaste BBM 13-21-seuns wat met groot sukses in die kudde gebruik is. BBM 13-21 het verskeie topdiere, manlik én vroulik, in verskillende kuddes reg oor die land geteel. BBM 13-21 se nageslag is bekend daarvoor dat hulle baie breed en diep is, en mooi vleis dra. Daar is reeds 54 kalwers van BBM 17-245 aangeteken en die Poggenpoels verwag nog ’n verdere 50 en meer. Die gemiddelde geboortegewig op sy kalwers is 32 kg en die gemiddelde gekorrigeerde 205 dae-gewig is 321 kg. Die gemiddelde keuringspunt op al sy kalwers wat al gekeur is, is agt, wat dui op ’n besonderse erfdwang.
Aan moederskant stam hy uit BBM 03-26, wat die koei met die grootste invloed in die Poggenpoels se kudde is. Sy moeder, BBM 14-75, spog self met ’n gemiddelde keuringspunt van agt oor al sewe haar kalwers met ’n 100% goedkeuring. Haar kalwers se gemiddelde speengewig is 290 kg, met ’n gemiddelde speengewigverhouding van 71%. Sy is ’n baie vroulike, vrugbare koei met ’n TKP van 399.
BBM 17-245 is bottelglad van haar met ’n lang stert. Hy beweeg gemaklik met ’n wakker houding en besondere goeie kloue en bene. Verder is die bul donker van kleur met baie mooi gevormde testes en byna die perfekte skede. BBM 17-245 het ook ’n uitstekende balans tussen goeie vleiseienskappe en goeie bespiering en manlikheid. Wat sy syfers betref, het hy ’n speen direk van 116, ná speen van 114 en ’n vrugbaarheidswaarde van 124, wat weereens ’n bewys is van hoogs produserende diere in die lyn.
“Hierdie is voorwaar ’n bul wat ons aanbeveel vir enige ander kudde en ons glo hy sal ’n groot bydrae kan maak waar hy ook al gaan,” sê Kobus.
Kyk gerus uit vir seuns van BBM 17-245 op die veiling: lotte 6, 9, 12,37 en 39.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.