Intussen steier groot dele van die binneland tans onder ’n hittegolf wat na verwagting nog etlike dae sal voortduur en oeste bedreig selfs in distrikte waar dit tot onlangs gereën het.
Langtermynvoorspellings dui ook daarop dat baie gebiede vir res van Februarie en Maart steeds gebuk sal gaan onder ondergemiddelde reënval. Boere wat deur droogte geraak is, hoop om darem die koste van hul insette te dek, maar sê daar is nie sprake van groot oeste nie. Die versengende hitte laat gesaaides kwyn.
Die hele Vrystaat en Noordwes en selfs dele van Mpumalanga soek dringend reën, sê dr. Werner Rossouw, direkteur en handelaar van Silostrat. “Die probleme vanjaar is dat daar distrikte is waar aanplantings steeds baie goeie potensiaal het, maar ander wat in dié stadium swaar trek weens ondergemiddelde reënval.”