Katoen bly die wengewas op droëland wanneer die reën wegbly en die ander gewasse begin verdor. Dit is hoofsaaklik vanweë ’n diep wortelstelsel wat die plant help om vog dieper te kan gaan haal, sê dr. Annette Bennett, uitvoerende hoof van Katoen SA.
Sy het in reaksie op die jongste oesskatting en die huidige omstandighede gesê boere in droë gebiede begin opnuut die waarde van katoen besef. “Dit het ’n wonderbaarlike vermoë om te herstel en ook om die droogte te weerstaan. Vir drooogtegebiede is dit werklik ’n goeie potensiële gewas. Ons hoop meer boere sal dit weer eens raaksien.
“Tans het ons eintlik net twee kommersiële kultivars. Hulle presteer steeds baie goed, maar ons soek nuwe teelmateriaal, veral kort groeiers wat kan help dat boere later kan plant as die reën wegbly.”
