“Dankie aan ieder en elk se bywoning, en wat daartoe bydra om landbou se storie te vertel en julle toewyding tot die Nampo-oesdag,” sê Graan SA.
Net minder as 82 000 mense het verlede jaar se skou bygewoon.
Landbouweekblad en Landbou Boerekos se Plaaskombuis was ook ’n groot trekpleister, en het 8000 etes tydens die vier dae wat die skou aangebied is, verkoop. Die Plaaskombuis is vanjaar vir die eerste keer aangebied in samewerking met Syngenta en Graan SA.
Altesaam 20 835 mense het gister, die laaste dag van die skou bygewoon, met 45 vastevlerkvliegtuie en 10 helikopters wat geland het, en 109 bewegings wat op die aanloopbaan hanteer is.
Dr. Dirk Strydom, hoof van Graan SA se Nampo-afdeling asook bemarkings- en navorsingskoördinering, het gister aan Landbou.com gesê die warmer weer by vanjaar se skou was 'n bydraende faktor tot die goeie besoekersgetalle.
Volgens dr. Tobias Doyer, uitvoerende hoof van Graan SA, wat vanjaar sy eerste Nampo aan stuur van Graan SA beleef het, is dit heerlik om te sien dat boere so ’n ongelooflike skou kan aanbied.
“Ons is nie professionele skou-organiseerders nie, en ons doen dit elke jaar,” het hy gister aan Landbou.com gesê.
Wat vir hom nog verder uitstaan is die uitstallers wat hulle beste produkte bring.
“Dit is soos ’n partytjie, jy kan almal uitnooi en die vleis en die huis verskaf, maar die partytjie is lekker omdat almal opdaag.”
Nampo 2025 sal volgende jaar op 13 Mei afskop.
Kyk hier na al die artikels, video’s, onderhoude, foto’s en interessante brokkies wat Landbouweekblad oor berig het: