Altesaam 254 mm reën is binne ’n 24 uur-tydperk in die stad Al Ain, ’n stad teen die VAE se grens met Oman, gemeet. Dit was die meeste reën vir ’n dag wat sedert 1949 gemeet is, berig Reuters. Swaar neerslae het ook in Oman en Iran voorgekom.
Doebai se gemiddelde jaarlikse reënval is sowat 140 mm. “Om dit in perspektief te stel is dié gemiddelde van Doebai minder as Upington in die Noord-Kaap se jaarlikse gemiddelde reënval van 180 mm,” sê Johan van den Berg, onafhanklike landbouweerkundige. “Die reënval van 16 en 17 April was dus dubbeld Doebai se jaarlikse gemiddelde reënval.”
Swak dreinering?
Van den Berg sê in die tweede week van Maart het reën van tot 50 mm op plekke ook vloede in Doebai veroorsaak. “As daar na die topografie van die gebied gekyk word, is Doebai baie naby aan seevlak en die omgewing baie gelyk. Dit veroorsaak dat dreinering baie stadig plaasvind.
“Die gebied se dreineringstelsels is ook swak ontwikkel omdat daar onder normale omstandighede baie min reën voorkom. Dieselfde het so ’n paar jaar gelede in Kaïro in Egipte gebeur toe ’n vinnige reënbui van minder as 30 mm groot dele van die stad laat oorstroom het omdat dreineringstelsels daar byna nie bestaan nie as gevolg van die baie droë toestande wat normaalweg daar heers.”
Van den Berg sê die groot hoeveelheid reën wat vandeesweek oor ’n kort tydperk oor Doebai voorgekom het, sou wel selfs in gebiede met taamlik goeie dreinering vloede van ’n ernstige omvang veroorsaak het.
Wolkstimulasie of klimaatsverandering?
Ná Dinsdag se gebeure is wyd gespekuleer of die swaar reën veroorsaak is deur wolkstimulasie, oftewel cloud seeding, wat in die VAE gebruik word om reënval in dié woestynagtige klimaat te stimuleer. Die proses behels dat chemikalieë in wolke ingeplant word om reënval te stimuleer. Die VAE is een van die leiers van dié tegniek.
Die VAE se meteorologiese agentskap het aan Reuters bevestig dat geen sulke stappe gedoen is voor die storm nie en dat dit dus nie die rede vir die swaar neerslae kon wees nie. Kenners sê die swaar neerslae is veroorsaak deur ’n normale weerstelsel wat deur klimaatsverandering vererger is. ’n Laagdrukstelsel in die boonste atmosfeer en ’n laagdrukstelsel op die oppervlak het druk op die lug uitgeoefen en dit het tot die neerslae gelei het, sê Esraa Alnaqbi, senior weervoorspeller by die VAE regering se nasionale sentrum vir meteorologie
Van den Berg stem saam dat aardverwarming die waarskynlikste oorsaak was met oseane wat warmer word, die warmer aardoppervlakte, maar veral ook die warmer atmosfeer, wat veroorsaak dat daar meer vog in die atmosfeer gehou kan word voordat dit as reën voorkom. “Indien kouer toestande dan voorkom, veroorsaak dit dat die oormaat vog kondenseer, druppels vorm en swaar reën veroorsaak.”
“Net soos wat die geval in Suid-Afrika was die afgelope weke met swaar reën plek-plek, het dieselfde in die VAE en omgewing gebeur toe ’n sterk laagdrukstelsel in die bolug ontwikkel het om ’n afsnylaagdrukstelsel te vorm. Dus het die baie vog vanweë ’n warmer atmosfeer in die lae nader aan die aarde en dan die laagdruk wat tot in die kouer bolug gevorm het, die swaar reën veroorsaak. Dit word gewoonlik versterk wanneer kouer lug, soos ’n kouefront, oor die gebied beweeg en kondensasie aanhelp.”
Dié gebeur is volgens Van den Berg direk gekoppel aan klimaatsverandering waar “normale” weerpatrone deur aardverwarming gestimuleer word om rampafmetings aan te neem. “Die voorkoms van hierdie soort stelsels gaan wêreldwyd al meer gereeld voorkom.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
