Mediaberigte oor sneeu op die N9 tussen Graaff-Reinet en Middelburg het Dinsdagoggend groot verwarring veroorsaak ná ’n video van Justin Kingwill die rondte begin doen het van hael op Amandelhoogte in die Paardekloofpas wat volgens hom “soos sneeu lyk”, en wat gevaarlike padtoestande kan veroorsaak. Hy sê swaar reën en hael het tussen sy plaas Blaauwater en Graaff-Reinet geval, maar net sowat 7mm het op sy plaas geval. Boere in die distrik Graaff-Reinet en Nieu-Bethesda sê hulle dra geen kennis van sneeuneerslae nie en dat hulle ook nie erge hael gehad het nie.
Johan van den Berg, onafhanklike landbouweerkundige, sê weerstelsels dui aan dat hael in die streek geval het. Hy sê die neerslag op die video is eerder hael as sneeu. Die Suid-Afrikaanse Weerdiens dra geen kennis van sneeu in dié omgewing nie.
Boere in die distrik Murraysburg het wel gister van 17:00 tot 20:00 ’n erge donderstorm met baie hael en swaar reën ervaar. “Die hael het plek-plek 15 cm diep gelê. Van die plase in die gebied het 50 mm in minder as 30 minute gemeet,” sê Jaco van der Berg, voorsitter van die Murraysburg-boerevereniging.
