Luidens ’n verklaring deur die departement van landbou, grondhervorming en landelike ontwikkeling is kliniese tekens van bek-en-klouseer op die plaas waargeneem.
Monsters is geneem en na die laboratorium op Onderstepoort gestuur. Die PCR- en serologieresultate was positief vir bek-en-klouseer, maar teen druktyd was die SAT-tipering van die virus nog nie beskikbaar nie.
Die Oos-Kaapse provinsiale veeartsenykundige diens het die plaas onder kwarantyn geplaas en met ’n epidemiologiese ondersoek begin om die moontlike oorsprong asook ander plase wat ook geraak kan word te identifiseer.
Aangrensende buurplase en plekke wat met die geaffekteerde plaas skakel, is ook as ’n voorsorgmaatreël onder kwarantyn geplaas totdat kliniese en serologiese ondersoeke afgehandel is om hul bek-en-klouseerstatus vas te stel.