Vyf faktore maak boer met Hugenoot-beeste vir Mary Lochner ’n plesier: hul langlewendheid, stapvermoë, kalfgemak, mooi temperament en gehardheid om in ’n ekstensiewe klimaat aan te pas.
Mary bedryf haar CTL Hugenoot SA-stoetery op die plaas Doringkraal by Marken in Limpopo, en smaak weer sukses met die aanwysing van die Elitekoei van die Jaar-toekenning. Die plaas is in die hart van die Bosveld geleë, met soetveld en ’n oormaat sekelbos en haak-en-steekbosse.
Bosluise en veesiektes kom grootskaals voor. Dit is hartwatergebied en die kalwers word vir die eerste twee maande geblok. Mary volg verder ’n streng gesondheids- en inentingsprogram vir spons-, lam-, milt- en knopvelsiekte en sy bekamp bosluise.
