Suid-Afrika voer gewoonlik net ten tyde van ’n krisis mielies in, sê dr André van der Vyver, uitvoerende direkteur van die Suid-Afrikaanse Graan-en-oliesadehandelsvereniging (Sacota). Die prys van geelmielies vir die JSE se Julie 2024-kontrak het weens die droogte en swakker oeste met 22% tot ongeveer R4 420/ton in April gestyg.
Dit het veroorsaak dat ingevoerde mielies uit Argentinië deur Kaapstad tussen R300 en R400/ton goedkoper as die binnelandse produk was. Die gaping het intussen vernou omdat die stroopproses vol aan die gang is.
Sacota wys daarop dat daar in die Wes-Kaap, en veral in die omgewing van Kaapstad, verskeie voervervaardigers en hoenderboerderye is. Daar word nie noemenswaardige volumes mielies in die provinsie geproduseer nie en dit moet vanaf besproeiingsgebiede in die Noord-Kaap of die suidweste van die Vrystaat daarheen vervoer word. In tye van moontlike tekorte en weens hoë vervoerkoste raak dit meer kostedoeltreffend om in te voer as om in die binneland aan te koop.
