Dalk was dit die wonderlike suksesjaar wat hulle in 2023 gehad het wat ons Springbokke in sulke ramkatte verander het? Of dalk was dit iets anders?
Maar om die een of ander rede lyk dit amper of ons Bokke nóg ’n rekord probeer opstel nadat hulle verlede jaar ’n historiese vierde Wêreldbekertoernooi, die tweede in ’n ry, gewen het. Sedert hulle uit Frankryk teruggekeer het, is die manne in groen-en-goud naamlik besig om teen ’n byna ongehoorde koers babas te verwelkom.
Dit voel soos elke tweede week dat ons verneem van nóg ’n Bok en sy vrou wat saam ’n swangerskap aankondig of laat hoor hulle het ’n nuwe bondeltjie vreugde ryker geword het. Dis babas by dosyne!