Kobus Poggenpoel van die plaas Aliceville by Setlagole, Vryburg, se Poggenpoel Molopo-Bonsmarastoetery is wyd bekend.
Sy produksieveiling lok jaarliks kopers van reg oor Suid-Afrika. “Goeie bywoning deur ons lojale klante wat ons jaarliks ruim ondersteun, stem ons tot diep dankbaarheid,” sê hy.
Dit dien as aansporing vir Kobus, wat saam met sy seuns, Phillip en Kobus jr., boer, om die diere elke jaar te verbeter. Die prestasie van die Poggenpoels se stoetery spreek vanself. Met seleksie konsentreer hulle onder meer op reproduksie, produksie en speengewigverhouding.
“As jy jou huiswerk doen, is ’n speengewigverhouding van 50% of selfs beter baie haalbaar,” sê Poggenpoel.
Hul Bonsmaras speen gemiddeld op 205 dae teen 270- 280 kg. Dit sluit bulle en verse in. Die koeikudde het ’n besettingsyfer van meer as 90%.
Die Poggenpoels se produksieveiling vind vanjaar op 28 Mei om 11:00 by die Noord- Kaap Lewendehawe-veilingslokaal op Stella plaas. Hulle hoop om 80 bulle, 10 uitsoekstoetkoeie en 200 kommersiële vroulike diere (in alle produksiestadiums) aan te bied.
Een van die kuddevaars, BBM 17-245, behoort ’n hoogtepunt te wees.
“Ons is dankbaar dat ons bulkopers elke jaar toeneem en elke nuwe koper is vir ons ’n nuwe vriend,” sê Poggenpoel.
Dit is met hierdie vriendelikheid wat hulle almal nooi om die veilingsdag saam met hulle deur te bring.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
