Beeste is vroeër op twee eiendomme net buite Humansdorp positief vir bek-en-klouseer getoets en op nog ’n plaas in die Zuurveld-omgewing wat saam as ’n eenheid bedryf word. Hierdie plase is onder kwarantyn geplaas en diere is ingeënt. Die siekte is in April vir die eerste keer in die provinsie aangemeld.
Diere op ’n ander plaas, 28 km van die oorspronklike eiendomme af, is egter nou ook positief getoets en daar blyk geen regstreekse skakel tussen die oorspronklike uitbreking en die jongste positiewe gevalle te wees nie.
Agri Oos-Kaap sê in ’n verklaring die oorsprong van die SAT 3-virus waarmee die beeste besmet is, kon nog nie bepaal word nie, en met die nuwe geval wat nie met die voriges verband hou nie, bestaan die moontlikheid dat die virus elders in die provinsie sirkuleer.