Die energiemaatskappy Kinetiko, in samewerking met FFS Refiners, het op 5 Mei ’n demonstrasie aan belanghebbendes gelewer oor hoe die krag vir kommersiële gebruik vervaardig kan word. ’n Reeks komponente wat nodig is om die aardgas veilig vanaf die boorgat tot by die gas-ontbrander te voer, is geïnstalleer om die opwekker met ’n kapasiteit van 1,2 MW aan die gang te kry. Barloworld het die CAT-opwekker opgerig en weer ná die demonstrasie afgetakel.
Dié mylpaal is ’n betekenisvolle stap vorentoe om Suid-Afrika se kragprobleme te help oplos, sê Nick de Blocq, uitvoerende hoof van Kinetiko. “Ons het die afgelope maande baie hard gewerk om die maatskappy se vermoë te bewys om krag uit vloeibare aardgas in ons Amersfoort-projek op te wek. Ons het gerespekteerde, professionele ingenieurs en verskaffers van toerusting gekry om die projek te ondersteun en ons is verheug om die voorlopers in die opwekking van vloeibare aardgas vanaf ’n plaaslike bron te wees.”
Kinetiko is met die Nywerheidsontwikkelingskorporasie (IDC) in vennootskap om sy gaseksplorasie-projek kommersieel te ontwikkel. Volgens ’n verklaring deur die maatskappy beplan die vennootskap om 30 boorgate in dié omgewing te ontwikkel om vloeibare aardgas te verskaf.