Landbouweekblad se Landbou Boerekos het vanjaar met Syngenta en Graan SA kragte saamgesnoer om die Plaaskombuis by die 56ste Nampo-oesdag naby aan hek 2 op die Nampoterrein aan te bied.
Christian Giesel, bemarkingsbestuurder vir Syngenta Suid-Afrika, en Chris Burgess, hoofredakteur van Landbouweekblad, het tydens die bekendstelling gesê die konsep vir die restaurant het ontstaan uit die idee om die produksie van landbouprodukte met die ervaring van eet te kombineer. Van Syngenta se saadprodukte, soos die unieke nuwe Yoom tamatie, word ook uitgestal.
“Die idee met ons spyskaart is dat iemand wat by Nampo uitstal elke dag iets anders kan probeer, terwyl Nampogangers wat net een dag hier kan wees, ’n wye keuse van disse het,” vertel Arina du Plessis, die redakteur van Landbou Boerekos en hoofsjef by die Plaaskombuis.
Dirk Lamprecht, bemarkingshoof van Landbouweekblad, sê Plaaskombuis kliënte kan ook inskryf vir ’n kompetisie om ’n gasbraaier van Cadac, ter waarde van net meer as R7 500, te wen. Die gelukkige wenner sal Vrydag aangekondig word ná ’n trekking.
Nampogangers kan van vroegoggend af by die Plaaskombuis heerlike koffie en beskuit kom geniet, met middagetes wat van 11:00 elke dag af beskikbaar sal wees.
Klik hier om meer te lees oor die Plaaskombuis se spyskaart.