Die departement van landbou, grondhervorming en landelike ontwikkeling publiseer jaarliks ’n Kortbegrip van Landboustatistiek met heelwat syfers oor die landbou. Dit gee ook sekere produksie- en finansiële syfers van die landbou – in dié geval bygewerk tot einde 2023. Die syfers sedert 2015 wat ek hier gebruik, gee ’n goeie aanduiding van die breë neigings binne die landbou se geldsake.
GRAFIEK 1 toon die verloop van inkomste en insette van 2015-’16 tot 2022-’23. Die inligting vir 2023-’24 is my eie raming. Die landbou se bruto produksiewaarde (omset) het in 2022-’23 met sowat 20% toegeneem tot R448 miljard. Ek verwag die nuwe jaar se toename sal kleiner wees.
In die tydperk van agt jaar het die bruto produksiewaarde met 132% gegroei. Insette aangekoop het in die jaar 2022-’23 met byna 14% gestyg tot R250 miljard. Die netto inkomste vir die jaar 2022-’23 het R126 miljard beloop (die departement trek insette aangekoop van bruto produksiewaarde af – wees dus versigtig met afleidings). Dit was ’n styging van 36% teenoor die vorige jaar.