Die staat het reeds £8 000 000 aan die skema bestee, en hierdie belegging word volkome geregverdig deur die bruto inkomste van £2 000 000 per jaar wat dit oplewer. Vanjaar se koringoes alleen het 300-350 duisend sakke opgelewer wat teen £1 000 000 van die hand gesit is.
Die gemiddelde bruto inkomste van die hoewebewoners is £1 500 per hoewe, hoewel individuele boere reeds vanjaar tot £5 000 van hul hoewes met ’n grootte van 30 morg (25,7 ha) elk, ingesamel het.
Daar is talle faktore wat boere na die nedersetting lok, soos droogtes en ’n gebrek aan kapitaal, maar seker die aanloklikste is die maklike voorwaardes wat die departement van lande aanbied om ’n proefhuurder te help. Die superintendent, A.D.E. Gutsche, vertel dat dit veral beginners en bywoners is wat deur die staat gehelp word om op hul eie bene te kan staan, maar dat baie boere wat deur langdurige droogtes geruïneer is, ook gehelp word.