Roosaknee
“Ek het roosaknee in my gesig. Die areas om my oë is erger aangetas. Wat is dit, en is daar enige behandeling beskikbaar?”
M Myburgh
Roosaknee, ook bekend as rosacea, is ’n langdurige rooi veluitslag van gebroke bloedvaatjies, gewoonlik in die sentrale area van die gesig. Die vel kan verdik, gewoonlik oor die neus, wat dan veroorsaak dat die neus onooglik kan vergroot.
Die oorsaak is onbekend. Dit begin gewoonlik na die middeljare en is algemeen in persone met ligte gelaatskleure. Dit is interessant dat hierdie toestand algemeen voorkom in alkoholiste. Mense met hierdie veltoestand moet sekere kossoorte vermy soos sterk speserye, alkohol, koffie en koeldranke wat kaffeïen bevat.
Die behandeling kan moeilik wees. Kortisoonsalf sal dit vererger, maar sekere antibiotika soos tetrasikliene kan voordelig wees. Salf wat antibiotika soos metronidasool bevat is ook van waarde.
Enige veluitslag wat in die gesig voorkom is ’n ernstige verleentheid, en dokters sal alles in hulle vermoë doen om dit te behandel.
(Huisgenootbrokkies)