Is jou motor besaai met lekkergoedpapiere en ongebruikte tamatiesouspakkies? Die volgende keer wanneer jy ‘n pastei of ‘n pakkie skyfies in die ry probeer afsluk, dink weer.
Een van die redes vir die kollektiewe gewigstoename onder Amerikaners, volgens dieetkundiges wat ‘n rede vir die vetsugpandemie probeer vind, is die feit dat eet in publieke plekke vir die samelewing aanvaarbaar geword het. Bykans die helfte van kos wat by kitskosrestaurante bestel word, word by deurry-restaurante bestel.
Die Europese dieetkundiges het aan die webtuiste Your Advisor gesê hulle is verstom dat Amerikaners voortdurend kou op straat – en selfs in museums en in die kerk. Die suksesvolste boekwinkels verkoop cappucino terwyl jy tussen die boekrakke rondsnuffel.
Die redakteur van die tydskrif Food Arts skryf dié eetstyl toe aan die dra van waterbottels deur die jappies in die jare tagtig. Volgens die dieetkundiges is eet op ‘n drafstap nie bevorderlik vir porsiebeheer of goeie spysvertering nie. Peuselhappies word nie in berekening gebring nie en verteenwoordig oortollige kilojoules.
(Uit: Die Burger, 23 Januarie 2002)