Health24.com se kuberdok, dr. Bets Breedt, antwoord vrae oor alledaagse gesondheidsprobleme.

1. V: My seun, wat maar net dertien jaar oud is, het gewrigsrumatiek, waarvoor hy behandel word. Sy neus bloei soms, gewoonlik net uit die een neusgat. Dit bekommer my, want dit gebeur in die nag, selfs in die middel van die winter.

Die bloeiery het al begin voor hy met gewrigsrumatiek gediagnoseer is. Gelukkig bloei hy nie baie nie en duur dit ook nie lank nie. Die bloeding word met neussproei en –room behandel. Dit is nie dalk hemofilie nie, is dit?

A: Nee, dis nie ’n teken van hemofilie nie. Dit kan dalk wees dat daar ’n aartjie in sy neus is wat maklik bars. Laat jou dokter ondersoek instel. Indien hy ’n aanvulling drink wat visolie bevat, kan dit sy neus laat bloei (omdat dit die vorming van bloedklonte belemmer). Sekere anti-ontstekingsmiddels kan ook die bloed verdun.

2. V: Ek kry elke maand iets wat net soos ’n mondseer lyk. Dit bly omtrent twee weke en dan verdwyn dit weer. Ek is desperaat.

A: Niemand weet eintlik wat mondsere veroorsaak nie. Stres, natriumlauriel wat in tandepasta voorkom, hoë nitraatvlakke in water, geurmiddels, essensiële olies, bensoësuur, kaneel, gluten, koeimelk, koffie, sjokolade, aartappels, kaas, vye, neute, sitrusvrugte en sekere speserye kan mondsere aanwakker.

Dit kan help om die salf Kenalog In Orabase Ointment onmiddellik op die seertjie te smeer sodra dit verskyn. Sit ’n dik laag op. ’n Goeie vitamien Baanvulling kan ook help; so ook die gereelde gebruik van ’n antibakteriese mondspoelmiddel.

3. V: My seun sukkel met verskriklike winderigheid. Sosiaal is dit vir hom ’n verleentheid. Sy opelyf is normaal, hy het geen probleme met spysvertering nie en ons kan dit nie met ’n spesifieke kossoort verbind nie. Sy dieet is baie gesond. Dink jy behandeling met probiotika kan help? Wat beveel jy aan?

A: Probeer probiotika drie keer per dag, Pancreoflat drie keer per dag, en vermy gaskoeldrank en kos wat gas veroorsaak.

Hierdie kossoorte sluit in aspersies, broccoli, spruitkool, kool, blomkool, mielies, komkommer, raapkool, preie, uie, ertjies, rissies, radyse, suurkool en rape. Omdat daar ander kossoorte is wat ook winderigheid kan vererger, laat jou seun ‘n eliminasiedieet volg om uit te vind watter die sondaars is. Sny vir ’n paar dae ’n sekere kos uit en kyk of die winderigheid verbeter.

Dit beteken nie al die onderstaande kossoorte is vir altyd van die spyskaart af nie. Hy moet net minder daarvan eet en dié wat sy simptome vererger vermy.

Kossoorte waarvoor ’n mens moet ligloop is gebraaide en vetterige kos, suiker, laktose, fruktose, sorbitol, versoeters, bone en ander peulplante soos sousbone, kekerertjies, nierboontjies, lensies, hereboontjies, pintoboontjies, koring en volkoring.

Daarby kom sekere vrugte soos appelkose, spanspeksoorte, pruime, rou appels, melk en ander suiwelprodukte, waaronder hoogs gefermenteerde kaas, eiers en onverteerbare vette soos Olestra (wat in aartappelskyfies gevind word).

4. V: Ek het ’n paar maande gelede knoppies op my ooglede begin kry. Ek het nou twee tot drie op elke lid! Hulle is nie te groot nie, maar is sigbaar as iemand van naderby kyk. Die knoppies het geen koppie of opening nie. Hulle is ook nie seer nie. Help asseblief.

A: As die knoppies ontsteek, pynlik is en tussen jou wimpers sit, het jy heel moontlik ‘n meibom-sist. Kliertjies in die ooglid genaamd meibom-kliere skei gewoonlik ’n dik, vetterige vloeistof, ’n velsmeer, in die wimpers se haarfollikels af.

Wanneer hierdie kliere chronies ontsteek raak, vorm ’n chalasion, oftewel ’n meibom-sist. Jou dokter sal dit moet dreineer of jou verwys na ’n oogspesialis indien die sist op ’n gevoelige plek geleë is.

As die knoppies geel en in die middel van die ooglid is, nie pynlik is nie en ook nie opklaar nie, kan dit vetknoppies wees weens die oorerflike siekte familiële hipercholesterolemie (FH). Gesels met jou dokter oor ’n cholesteroltoets.

Behandeling met cholesterolverlagende middels kan baie help om mense met FH se risiko vir ’n hartaanval te verlaag.

Huisgenoot Pols Somer 2007/8