Die beelde wat ’n mens deesdae met nuwe vierdimensionele sonartegnologie van ’n baba in sy ma se baarmoeder kan sien, is ongelooflik lewensgetrou. Dis nie net mooi prentjies nie – dis soos ’n video waarop jy kan aanskou hoe die baba se gelaatstrekke lyk, hoe hy sy vinger in sy mond druk, en hoe hy gaap, draai en skop. Fetale abnormaliteite kan betyds opgespoor word en so kan jou baba se lewe dalk gered word.

Enige sigbare abnormaliteite soos Down-sindroom, ’n oop ruggraat (soos met spina bifida) of ’n piepklein hartjie waarvan die kamers of kleppe nie reg werk nie, kan met dié gesofistikeerde tegnologie raakgesien word.

En selfs al is 4D-tegnologie nie altyd beskikbaar nie, kan die meer algemene 2D-ondersoek ook veel doen om gesondheidsprobleme op te spoor – solank dit deur ’n kundige uitgevoer word, sê dr. Linnie Muller, een van Suid-Afrika se top- fetale spesialiste.

Linnie noem drie belangrike feite oor geboorte-afwykings en sonars wat elke swanger vrou moet ken:

1. Verreweg die meeste geboorte-afwykings – trouens meer as 90 persent – kom voor in swangerskappe waar albei ouers gesond en normaal is en nie een ’n familiegeskiedenis van enige sulke afwykings het nie.


2. Die swanger ma se leefstylgewoontes soos drank- of dwelmmisbruik kan abnormaliteite by haar ongebore baba veroorsaak of sy of haar lewe in gevaar stel.


3. Hoe beter ‘n spesialis opgelei is, des te groter is die kans dat hy ’n abnormaliteit by die ongebore baba sal opspoor. Nie alle huisdokters, verloskundiges of radioloë met ’n sonarmasjien sal alle abnormaliteite raaksien nie.

Hierdie tabel wys hoe ’n groot verskil deeglike opleiding kan maak in die voorgeboortelike opsporing van abnormaliteite.