Health24.com se kuberpsigiater, prof. Michael Simpson, beantwoord jou vrae oor geestelike welsyn.

V: Ek is ’n enkelma en my dogtertjie is drie en ’n half. Ons het nog nooit meer as een nag weg van mekaar deurgebring nie. Ek gaan binnekort vir ’n week by ’n vriendin in Brittanje kuier en my dogtertjie moet by my ouers bly.

Sy het ’n hegte verhouding met hulle en is baie tevrede by hulle, maar ek is ’n bietjie bekommerd dat sy nie ’n hele week sonder my sal kan klaarkom nie. Wat is die beste manier om aan haar te verduidelik dat ek so lank weggaan, maar dat ek haar soggens en saans sal bel?

A: Wees bewus daarvan dat sy miskien jou angstigheid kan aanvoel en dan self angstig kan voel. Omskep dit in ’n avontuur en herinner haar aan hoe seker jy is dat sy die ervaring goed sal hanteer.

Kinders is oor die algemeen baie beter bestand teen stres as wat ons verwag. Dit kan heel moontlik vir jou moeiliker wees as vir haar! In die Tweede Wêreldoorlog het kinders die bomaanvalle – toe hele strate snags verwoes is – verrassend goed hanteer as hul ouers taamlik kalm en optimisties was.

V : Wanneer ek by ’n klub of partytjie is en iemand vra my om te dans, is ek skielik doodbang vir dans. My hart begin vinniger klop en ek voel naar. Ek het uiteindelik gehoor dit word chorofobie genoem, maar het al oral gesoek en kon nêrens vasstel hoe ’n mens dit genees nie.

A: Dekades gelede het ’n groep mense met baie vrye tyd ’n klomp uitheemse woorde uitgedink om elke moontlike soort fobie te beskryf, maar hul moeite was nie eintlik van veel nut nie. Wat jy het, is basies ’n fobiese angsafwyking en kan soos ander fobiese angsafwykings behandel word. Die fobies waar dit dalk kan help om subtipes te spesifi seer, is agorafobie en sosiale-angsafwyking – en daar is ’n sweempie hiervan in jou brief.

Ek wonder of dit werklik ’n vrees vir dans is. As jy alleen in ’n kamer sou dans, sal jy dan ook sleg voel? Dit klink meer na ’n sosiale fobie – ’n vrees om tussen ’n klomp mense uit te staan of om voor ander iets te doen wat hulle dalk na jou sal laat kyk. Mense met dié fobies reageer goed op twee soorte behandeling: Party medisynes wat gebruik word om depressie te behandel, kan help. So ook kognitiewe gedragsterapie, ’n soort praatbehandeling.

V: My man stel my werklik teleur. Hy het ’n stokperdjie wat vereis dat hy ure aaneen voor sy rekenaar sit. Hy probeer nou al ’n hele ruk om ’n nuwe werk te kry. Sy salaris is verskriklik klein en sy baas ’n absolute nagmerrie. Daar was onlangs ’n wonderlike geleentheid en hy het vir ’n onderhoud gegaan. Hulle bied ’n baie goeie salaris aan, maar sy werkure sal eff ens langer wees en hy sal dalk vir een naweek per maand op bystand moet wees.

Hy is nie seker of hy die werk moet aanvaar nie, omdat hy dan nie “sy ding” op die rekenaar sal kan doen nie. In die nuwe maatskappy sal hy kan vorder, maar daar is nie sulke moontlikhede waar hy nou is nie en dinge gaan nie verbeter nie. Ons bly in ’n krot en dié werk sal dinge vir ons makliker maak. Dit lyk my hy dink net aan homself en ek weet nie meer wat om met hom te maak nie.

A: Dit is nodig dat julle die saak kalm verder bespreek. ’n Stokperdjie is goed vir ’n bietjie ontspanning en pret, maar dit is kortsigtig om ’n moontlike werk met ’n goeie salaris en vooruitsigte van die hand te wys net om meer tyd voor die rekenaar te kan deurbring. Herinner hom daaraan dat die feit dat hy so ’n slegte werk en baas het, moontlike redes is hoekom dit deesdae vir hom so belangrik is om “sy ding” op die rekenaar te doen.

As die nuwe werk hom meer bevrediging verskaf, sal hy miskien vind dat, hoewel hy nog steeds sy tyd voor die rekenaar geniet, hy dit nie meer so nodig sal hê nie aangesien dit nie sy enigste bron van plesier en vervulling sal wees nie.