Kom saam op ons goggatoer in die Herfs uitgawe van Pols en ontdek die monsters van die mikrowêreld.
Sien gediertes seshonderd keer so groot as wat hulle werklik is – en gril!
Deur Michelle Pietersen

Swaar dra, dierasie!
Die larwe van ’n gaasvlieg dra plantstukkies op sy rug as kamoeflering. Dié gogga maak stukkies blare en stokkies bymekaar en pak dit op sy rug sodat ander diere (en jy) hom nie dadelik moet raaksien nie. Die stekels op sy rug hou sy vrag bymekaar. Al lyk hy so vreemd met sy vrag en sy lang snoet, hoef jy glad nie vir hom bang te wees nie, want hy kan nie mense seermaak nie. Ander insekte moet ligloop – gaasvlieë eet plantluise, die klein groen goggatjies wat op blomme boer.

Mislike muskiet
Dit lyk miskien soos ’n onskadelike groen strooitjie met ’n rooi punt, maar dis ’n gevaarlike kalant dié. As ’n muskiet jou steek, deurboor die rooi punt jou vel en suig hy met die groen strooitjie jou bloed op. Muskietbyte kan vreeslik jeuk en sommige kan malaria veroorsaak. Slaap dus liewer onder ’n muskietnet en drink jou malariamedisyne as jy in die Krugerwildtuin, Mpumalanga, KwaZulu- Natal, Limpopo of Mosambiek gaan vakansie hou.

Harige meneer mot
Wie sou ooit kon raai dat die mot se voelers oortrek is deur skubberige vel en hare? Motte gebruik die hare op hul voelers om dinge mee te voel. Terwyl jy snags slaap, is dié gediertes wawyd wakker en bedrywig. Daarom word hulle naginsekte genoem.

Wit verskrikking
So ’n klein witvliegie kan groot verwoesting saai. Dié insek laat heuningdou op plantblare agter, wat dan ander plae en skimmel aantrek. Op hul beurt verniel hulle die blare. Witvlieë kan in swerms voorkom en groot skade aan groente en katoenboerdery aanrig.

Hierdie brakkie blaf nie
Sy groot oë lyk gevaarlik en sy hare is byna soos dié van ’n steekhaarbrakkie – dis hoe die heuningby van naby lyk. Bye is dapper klein soldate as hulle hul heuning moet beskerm. As ’n by dink jy wil die nes of koningin seermaak, sal hy jou steek met sy angel, wat op sy stert sit. Praat van ’n brandpyn! Sommige mense is baie allergies vir bysteke en jy moet met hulle hospitaal toe jaag as hulle gesteek word.

Kyk hoe kyk hy vir my!
Die vrugtevlieg se yslike rooi oog kan ’n mens groot laat skrik. Dis eintlik honderde ogies wat almal langs mekaar sit. Daarmee kan die vlieg in alle rigtings kyk, selfs agter sy kop. Jy moet maar na jou ma luister en ’n vrug afwas voor jy die eerste hap vat, want die vrugtevlieg het dalk sy eiertjies op die skil gelê.

Foto's van hierdie insekte wat tot 600 keer vergroot is het verskyn in die Herfs 2008 uitgawe van Pols.