Wat is die verskil tussen 'n bakterie en 'n virus? En wat werk teen griep?
Deur Betina Louw en die Health24-span

Bakterie vs. virus

Baie bakterieë en virusse is aansteeklik of oordraagbaar.

Albei kan jou lelik siek of selfs doodmaak, tog werk hulle op twee heeltemal verskillende maniere.

’n Bakterie is ’n “lewende diertjie” wat kan begin groei net waar hy beland: op die stoof of die bad se rand, of in jou ore, longe of brein.

Virusse kan egter nie op hul eie buite ’n gasheer soos ’n mens, dier of plant vermeerder nie.

Alle bakterieë is nie skadelik nie, maar sommige kan jou baie siek maak.

Siektes wat deur bakterieë veroorsaak word, is byvoorbeeld brongitis, longontsteking, tuberkulose, oorontsteking en rumatiekkoors.

Siektes wat deur virusse veroorsaak word, sluit in griep, verkoue, herpes, hepatitis, klierkoors, masels, polio, Duitse masels en vigs.

Hoe beveg jy bakterieë en virusse?

Bakteriële infeksies word met antibiotika behandel. Hoe meer spesifi ek die antibiotikum teen die betrokke bakterie is, hoe doeltreff ender is die behandeling. Sommige bakterieë word egter te slim vir antibiotika.

Antibiotika help nie teen virusse nie, maar daar is spesifi eke antivirale middels waarmee jy virusinfeksies kan behandel.
Daar is ent stowwe teen sommige virusse soos polio en masels.

Antibiotika magteloos teen griep

Geen antibiotikum gaan jou enigsins help teen ’n virus nie.

Nuwe middels teen griepvirusse wat as neuramidase-blokkers bekend staan (handelsname Relenza en Tamiflu), kan jou gesond maak as jy dit binne 24 uur neem.

Maar griep verswak die immuunstelsel, en by party mense is dié swakker weerstand net die ding waarop bakterieë wag om veral in die longe te floreer.

As jy griep kry met tipiese hoof- en lyfpyne, gevolg deur ’n bors wat seer word en ’n gehoes wat eers droog is en dan los word, is dit eintlik weens ’n opvolgende bakteriële infeksie in jou longe (brongitis of longontsteking).

Die bakteriële infeksie moet met antibiotika behandel word, veral as jy geneig is tot asma en longprobleme.

En dan is daar prions . . .

’n Prion is nie ’n virus óf ’n bakterie nie, maar ’n baie slim klein proteïen wat die brein aanval tot die mens of dier doodgaan. Dit kan tot drie jaar lank in die grond oorleef en daar is geen behandeling daarvoor nie.

’n Prion-infeksie veroorsaak Creutzfeldt-Jakob-siekte in mense en malbeessiekte in vee. Tans word aanvaar dat jy ’n prion-infeksie kan kry as jy besmette vleis eet, veral vleis wat met breinvloeistof (serebrospinale vog) of breinweefsel in aanraking was.

’n Prion het geen DNS nie, maar kan homself verdubbel. Hoe hy dit doen, is steeds ’n raaisel vir wetenskaplikes.

Saamgestel met die hulp van prof. Koos Albertyn, mikrobioloog aan die Universiteit van die Vrystaat, en prof. Wolfgang Preiser, hoof van die afdeling vir mediese virologie aan die Universiteit van Stellenbosch se fakulteit gesondheidswetenskappe.