ELKE GESIN MOET DIT LEES

Toe ek een oggend in my spreekkamer sit en my pa (dr. Danie Myburgh, wat jare lank op Oudtshoorn as dokter gepraktiseer het en steeds daar woon) my bel en sê ek moet Huisgenoot-Pols gaan koop aangesien dit ’n fantastiese nuwe tydskrif met goeie artikels is, was ek effe verbaas.

My pa dink nie maklik ’n artikel is goed nie, wat nog te sê ’n hele tydskrif! Ek het dieselfde middag Huisgenoot-Pols gaan koop en stem 100 persent met hom saam.

Die artikels is goed nagevors, maar tog verstaanbaar geskryf en daar is volop praktiese raad.

Die verskeidenheid van artikels maak die tydskrif heerlike dog insiggewende leesstof: van diepteinligting oor siektes, die stories van regte mense wat self dinge beleef en oorwin het, tot die aanloklikheid van ’n gesonde leefstyl.

Dit vul ’n groot leemte, want mense het altyd baie vrae oor gesondheidsdinge.

Nou koop ek elke keer sommer twee Huisgenoot-Polse vir my spreekkamer. Al my pasiënte is gaande oor jul tydskrif!

Geluk en doen so voort!

Dr. Karen Ferreira, Kenridge

MY TIENERDOGTER IS MOEILIK

Ek verwys na die brief “Die kinders tart ’n mens uit” (Huisgenoot-Pols, Somer).

Hoe diagnoseer ’n mens aandaggebrek- steurnis en hiperaktiwiteit? Ek het ’n probleem met my tienerdogter van vyftien jaar.

Sy was tot in gr. 7 ’n pragtige, gehoorsame kind en het baie goed presteer. Sedert sy in gr. 8 is, het sy soos handomkeer verander.

Sy wil geen dissipline aanvaar nie en ignoreer versoeke tensy sy gedreig word – en dan sal sy ongeskik word en dit baie teësinnig doen.

Sy het al pille probeer drink, weggeloop en vertel baie leuens om haar sin te kry. Ek is raadop. Dit veroorsaak oneindige probleme.

Ek is ’n enkelouer. Ek werk nog al die jare en kon haar seker nie soveel aandag gee soos ’n ouer wat nie werk nie. Ek het dit vir ons huisdokter genoem, maar hy sê dis doodeenvoudig hoe ’n tiener is en dat daar baie groepdruk in skole is. Kan julle help?

Ria, Vanderbijlpark

Ria, lees gerus ons artikel oor tieners. Ons hoop dit help om nuwe insig en begrip te bring. – Red.

DIE REGTE MUSKIET

Die foto by die artikel oor malaria (Astrante klein kalant, HG-Pols, Somer) is van ’n onskadelike muskiet.

’n Spesifieke soort muskiet, die Anopheles-spesie, dra malaria oor.

Die soort op die foto speel geen rol nie en dit kan mense net verwar.

Dr. Hugo van Niekerk,
Bailliepark

Inhoudsredakteur: Baie dankie, dr. Van Niekerk. Die spesifieke artikel was oor muskiete in die algemeen, maar daar is inderdaad sowat 400 Anopheles-spesies in die wêreld, waarvan sowat dertig tot veertig malaria oordra.In Afrika is daar veral drie soorte Anopheles-muskiete waarvoor ’n mens moet koes.

UITSTEKENDE BRON VAN INLIGTING

Ek wil graag die span wat Huisgenoot- Pols saamstel, gelukwens.

Hoe dikwels stap ons nie by ’n winkel in nie en word oorgehaal om ’n tydskrif te koop deur reklamefoefi es wat goeie leesstof van die eerste tot die laaste bladsy belowe?

Net om tuis met teleurstelling agter te kom dat daar hoogstens een of twee ordentlike en intelligente artikels is – die res is advertensie ná advertensie, of gaan oor wie wat gedoen het!

Uiteindelik het ek ’n tydskrif gevind wat elke sent werd is. Huisgenoot- Pols is soos ’n lang roman; jy lees dit van voor tot agter.

Selfs die advertensies is gepas en die moeite werd om te lees. As ’n opvoeder en ouer van twee jong seuns vind ek die artikels ’n merkwaardige bron van inligting, inspirasie en opvoedkundige waarde vir mans en vroue, jonk en oud.

Knap gedaan met die eerste twee uitgawes. Ek sien uit na die volgendes.

Suzie du Plessis, Port Elizabeth

VEILIG OM BLOED TE SKENK?

In Desember was daar verskeie versoeke op die radio en televisie dat mense moet bloed skenk.

Ek het nog nooit nie, uit vrees dat dit my gesondheid kan benadeel. Kan julle asseblief vir my en ander moontlike skenkers inligting gee oor of dit in Suid-Afrika veilig is om bloed te skenk en te ontvang?

Ek sou ook graag wou weet of daar voordele vir die skenker is.

Mev. H.J. Potgieter, Evander

Dit is nou op ons artikellys. – Red.

Ons artikel oor dieetklubs het baie reaksie uitgelok.

Ketogeniese diëte – gevaarlik of nie?

Curves sê:

Ek skryf na aanleiding van die artikel “Dieetklubs: Watter plan werk?” (HG-Pols, Somer) en spesifiek die dieetkundiges se slotsom met verwysing na Curves: “Ons kan nie ’n ketogeniese eetplan aanbeveel nie.”

As jy nie ’n nierprobleem het nie en gesond is, is matige ketose onskadelik solank jy genoeg water (minstens agt glase per dag) drink om die ketone uit jou niere te spoel.

Op die Curves-maaltydplan moet lede wat die hoë-proteïendieet volg, hul koolhidrate ’n week lank beperk tot 100 g per dag, en daarna tot 120 g daagliks tot hulle hul teikengewig bereik – wat meer is as die 60 g koolhidrate voor ketose begin.

Curves se gewigsbeheerplan het ook ’n wonderlike slot-strategie wat lede in staat stel om hul metabolisme te verhoog en hul gewig te monitor.

Oefening maak ’n belangrike deel van die plan uit.

Jacqui Brill, Curves-oefeninstrukteur, Uitenhage

SureSlim sê:

• Ons eetplanne bestaan nie uit ’n laekoolhidraat/hoëproteïendieet nie. Ons eetplanne is gegrond op 50 – 55 persent koolhidrate, 30 – 35 persent proteïene en 15 – 20 persent vet.


• Nie alle kliënte moet vyf uur tussen maaltye wag nie. Diabete, mense met maagsere en kinders word byvoorbeeld toegelaat om minder as vyf uur te wag.


• Prof. Tessa van der Merwe maak die stelling dat jou dieet nie die afskeiding van die groeihormoon of die verhouding tussen die groeihormoon en insulien kan beïnvloed nie.

  Ander navorsers het egter getoon dat die verlaging in insulienvlak die produksie van die groeihormoon stimuleer.



• Ons dink nie bloedtoetse is onnodig nie. Die toetse help ons om probleme soos bloedarmoede, ’n ooraktiewe skildklier en diabetes uit te wys. Dié probleme verg dikwels mediese hulp en aanpassings in die eetplan.


• Die energie-inhoud van ons “quick loss”-program is tussen 4 200 en 5 000 kilojoules (kJ) en bevat oorgenoeg koolhidrate om ketose te voorkom. HG-Pols mislei ook lesers deur te sê “die energie-inhoud van die dieet is so laag dat mense kosdrange kry en fi siek swak voel”.


• Dit is verkeerd om te sê baie SureSlim-kliënte kry hoofpyn en voel bewerig.

Sharon Lewis, SureSlim Wellness Clinics

Inhoudsredakteur: Ek het ’n paneel van onafhanklike dieetkundiges en dokters gevra om dié briewe te beantwoord.