V: Kan Sint Janskruid en aandblomolie-kapsules saam met Fortzaar-bloeddruktablette gebruik word?

A: Al is daar geen defi nitiewe resultate beskikbaar oor die uitwerking van Hypericum (Sint Janskruid) op Fortzaar nie, beveel ek aan dat jy die saak eers bespreek met die dokter wat dit voorgeskryf het. Dis omdat daar ’n risiko vir hoë bloeddruk bestaan wanneer Sint Janskruid geneem word saam met kos wat die natuurlike chemikalie tiramien bevat, soos sekere soorte kaas en wyn. Die wisselwerking tussen Sint Janskruid en tiramien kan jou bloeddruk verhoog. Aandblomolie is goed vir bloeddruk en help dit verlaag. Dit bly egter steeds ’n goeie plan om jou dokter te laat weet watter natuurlike produkte jy saam met voorskrif medisyne gebruik.

V Mag ’n apteker jou die generiese ekwivalent gee van ’n middel wat die dokter voorgeskryf het? Is daar enige oor-die-toonbank-antibiotika, of kan jy antibiotika net deur middel van ’n doktersvoorskrif kry?

A Ja, jou apteker mag dit sonder jou dokter se toestemming doen, tensy die dokter uitdruklik aandui dat geen generiese produk gebruik mag word nie. Dié verandering is ’n paar jaar gelede ingestel. Om die waarheid te sê, jou apteker móét jou inlig as daar ’n generiese produk beskikbaar is; dit is dan jou keuse of jy dit wil hê. Onthou egter dat dié reël net vir generiese ekwivalente geld – ’n apteker mag nie sommer net ’n medisyne vervang met ’n terapeutiese ekwivalent (’n ander middel met ’n soortgelyke uitwerking) nie. Alle antibiotika vereis ’n voorskrif.

Stuur jou vrae oor medisyne aan die kuberapteker. Besoek www.health24.com en klik op “Experts” en dan op “Pharmacist”. Die antwoorde op jou vrae sal binne ’n paar dae op die webtuiste verskyn.