Besiger as die besigste snelweg, maar snelvloeiend sonder enige oponthoud of verkeersknope . . . Só word duisende boodskappe tegelykertyd kruis en dwars deur die brein gelei. Met ’n nuwe super skandeerder kan ’n mens nou dié besige snelweë in jou brein en hul bestemmings sien
Deur Marí Hudson

’n Ingewikkelde netwerk van senuselle gelei op dieselfde tyd duisende boodskappe van en na die brein. Elke baan bestaan uit ’n string enkelsenuselle, en boodskappe word seepglad en blitsvinnig van senusel tot senusel gelei.

Die pers bane gelei impulse van die brein na die res van die liggaam. Die groen bane gelei impulse tussen verskillende dele van die brein. Die pienk bane laat die linker- en regterbrein met mekaar kommunikeer.

HANDBEWEGING.
Die geel deel in die regterbrein word aktief wanneer jy jou linkerhand beweeg, en die groen deel wanneer jy jou regterhand beweeg. Dié beeld wys presies watter deel van jou brein jou hande se bewegings beheer.

WOORD- EN TAAL-AREAS.
Die man in die eksperiment moes aan woorde dink en dit het die woord- en taal-areas in sy brein laat f ikker.

VISUELE AREAS.
Daar is met ’n flits in die man se oë geskyn en onmiddellik het die visuele areas in sy oksipitale lobbe geflikker soos dit boodskappe verwerk het om hom te vertel wat hy sien.

Jy het twee kerne – een in elke helfte van jou brein – waar emosies soos empatie, hartseer en woede gesetel is. Die twee kerne “gesels” met mekaar, soos duidelik in die pienk kommunikasiebane tussen hulle gesien kan word.

Die frontale lobbe, wat rasionele denke beheer, gesels ook met die kerne soos deur die groen bane aangedui. Dié kommunikasie stel jou in staat om jou emosies met rasionele denke in toom te hou. By ’n psigopaat is dié vesels tussen die frontale lobbe en die kerne foutief.

Die skanderings is verskaf deur die Kaapse Universiteite se Breinbeeldingsentrum. Die Universiteit van Stellenbosch, die Universiteit van Kaapstad, die Mediese Navorsingsraad en Siemens is betrokke by dié sentrum, waar navorsing oor die brein se werking gedoen word om onder meer psigiatriese, breinbeseerde en beroertepasiënte te help.

Fascinating brain facts