Ma se negatiewe gemoed sleg vir haar kind

Jou baba van so jonk as ses weke kan aanvoel as sy ma angstig en depressief is, en sy gemoedstoestand outomaties by hare aanpas.

Psigiatriese navorsers van die Oxford-universiteit het in ’n nuwe studie bevind dat ’n ma se negatiewe gemoedstoestand tot depressie by haar baba kan lei.

Die studie bewys dat ’n baba op ses weke reeds bewus is van hoe sy ouers met hom kommunikeer en op nege maande sy ouers se gesigsuitdrukkings kan vertolk, en dat ’n baba dan sy eie gemoedstoestand by dié van sy ma aanpas.

Dit is belangrik dat ma’s wat aan nageboortelike depressie en angs ly, sielkundige hulp kry voordat dié probleem haar en die baba benadeel.

Bevries ovums nou vir babas

Nuwe navorsing maak dit nou vir jong Suid-Afrikaanse vroue moontlik om hul eierselle (ovums) suksesvol te laat bevries vir latere gebruik.

Vroue wie se eierstokke deur kankerbehandeling beskadig kan word, of wie se eierstokke verwyder moet word, kan voor die behandeling hul ovums laat vries sodat hulle wel later ma kan word, sê prof. Thinus Kruger, fertiliteitspesialis van die Universiteit van Stellenbosch.

Danksy dié nuwe tegnologie kan vroue wat op dertig nog nie hul ridder op die wit perd ontmoet het nie, ovums laat vries terwyl dit nog sterk is sodat hulle later in hul lewe kinders kan hê. Ovums kan vir ’n onbeperkte tyd gevries en bewaar word. Sperm- en embriobevriesing word al ’n hele ruk in Suid-Afrika gedoen. ’n Vrou se ovums word bevries binne ’n uur nadat dit geoes is.

Ovumbevriesing kos tussen R10 000 en R15 000. Skakel die US se fertiliteitseenheid by 021-531-6999 vir nog inligting.

PLOOIE SKOONVELD MET STAMSELLE

Prof. Don du Toit, ’n Kaapse selbioloog, het ’n nuwe verjongingskuur ontwikkel wat langer werk as Botox, nie so drasties is soos laserbehandeling nie en in die spreekkamer gedoen kan word.

Dié nuwe verjongingsbehandeling staan bekend as plaatjie-ryk-plasma- (PRP) mesoterapie en dit kan enige plek op die gesig, nek of lyf ingespuit word. Die nuwe tegniek, waar groeifaktore uit die pasiënt se eie bloed gehaal word om in die plooie te spuit, word al in verskeie sentra in die wêreld ingespan.