Health24.com se veearts, dr. Cedric Tutt, en die dieregedragskenner Karen Gray-Kilfoil beantwoord vrae oor dieregesondheid

V My dierbare jong hond dolwe my tuin om. Ek’s skoon radeloos. Wat moet ek maak?

A Honde grawe gate met ’ n doel. Jong hondjies doen dit uit nuuskierigheid, maar die meeste hou ná ’n paar maande op. As ’n jong hond aanhoudend gate grawe, is hy dalk verveeld.

Gaan stap dus elke dag minstens twintig minute met jou hond. Laat hom aan ’n lang leiband en ook buite jou erf stap sodat hy alles kan beruik wat hy wil en ander honde kan ontmoet. Dit kan ook baie help as jy jou hond vir afrigting neem sodat hy gehoorsamer kan word. Gee hom ’n klomp speelgoed waaraan hy kan kou en wissel hulle daagliks af sodat hy nie verveeld raak nie.

Sit ’n bietjie van sy droë hondekos in ’n groot, leë plastiekkoeldrankbottel wat hy kan rondrol. Jou hond het ’n plekkie in die tuin nodig waar hy mag grawe. Besluit self waar, en begrawe daar vlak onder die grond van sy speelgoed waaraan hy gereeld kou. Onthou dat ’n hond die geselskap van ’n mens of ander hond of kat nodig het en graag wil sien wat buite sy erf aangaan.

V Ek het onlangs per ongeluk ’n houer met ys langs my vyf maande oue labrador-hondjie laat val. Die harde geraas het haar laat skrik en sy het die hasepad gekies!

Sedertdien raak sy bang as ek naby is en wil glad nie nader kom as ek enigiets in my hand het nie.

A Gaan sit op die vloer en roep haar. As sy kom, bederf haar met ’n snoephappie. Mettertyd kan jy begin om haar te roep terwyl jy kniel, daarna as jy op ’n stoel sit en dan as jy staan.

Snoephappies help haar om jou met ’n aangename ervaring te verbind.

V ’n Kollega het verlede maand twee volwasse katte wat ’n goeie huis nodig gehad het aangeneem. Toe sy hulle gekry het, het hulle Hills Science Diet vir volwasse katte geëet en gesond gelyk.

Hulle het intussen begin opgooi elke keer dat hulle eet en sy sê dit lyk asof daar goeters in hul pels rondkruip. Hulle spring rond asof hulle gebyt word. Wat kan dit veroorsaak en moet sy hulle veearts toe neem?

A Dit kan dalk vlooie wees wat hulle laat bontspring. Dis nie ’n slegte plan om hulle veearts toe te neem nie. Daar is baie doeltreff ende middels teen vlooie en ‘n kenner sal die beste raad kan gee.

V My dwergpinscher van agt jaar ly dalk aan rumatiek. Wanneer ek haar roep, spring sy nie soos gewoonlik op nie; sy kyk net opgewonde vir my, maar beweeg glad nie.

Sy word al grys en het nie meer tande nie. Is daar raad vir rumatiek?
Ek het gehoor ’n mens kan die simptome met anti-infl ammatoriese jel vir perde behandel. Is dit ’n goeie plan?

A Dit kan dalk ’n probleem met die werwelskywe eerder as artritis wees. Laat haar asseblief deur jou veearts ondersoek sodat hy die regte behandeling vir die toestand kan voorskryf of haar vir verdere behandeling verwys.