Dis byna te goed om waar te wees en word as die grootste deurbraak in diabetes die afgelope twintig jaar beskou: insulien wat met ’n pompie ingeasem word pleks van ingespuit word.

Dit kan binne ’n paar maande werklikheid word vir duisende Suid-Afrikaners wat aan tipe 1- en 2-diabetes ly en wat hulle daagliks moet inspuit.

Meer as 5 miljoen Suid-Afrikaners ly aan diabetes. ’n Skokkende 50 persent van alle diabete se siekte word, hoofsaaklik weens hul vrees vir naalde, nie goed beheer nie. Dié mense loop ’n groot gevaar om hartsiektes en ander gevaarlike komplikasies te ontwikkel. Sonder insulien sal ’n tipe 1-diabeet binne agttien maande sterf.

Die insulienpompie is ontwikkel omdat insulien nie gesluk kan word nie. Dit werk byna nes ’n asmapompie, volgens die farmaseutiese vervaardiger Pfizer.

Die inasembare insulien word deur die longe opgeneem, en kan diabetespille en kortwerkende insulieninspuitings vervang. Die nuwe produk, Exubera, word nie aanbeveel vir diabete wat rook of aan asma of emfi seem ly nie.

6 MAANDE
Binne die bestek van ses maande kon navorsers sien dat verjongingsrome met 0,4 persent retinol (’n soort vitamien A) werk. Die rome is op 87-jariges getoets en het hul plooie minder gemaak en hul velle gladder en elastieser. Onder ’n mikroskoop het die vel meer begin lyk soos die vel van jonger mense.

Elektrodes op gehoorsenuwee gee nóg beter gehoor

Piepklein elektrodes wat regstreeks op die gehoorsenuwee ingeplant word, en dalk nog beter gehoor kan gee as kogleêre inplantings, gaan binnekort die eerste keer op mense getoets word.

Die nuwe inplantings, ontwerp deur navorsers van die Universiteit van Michigan, het dowe diere in staat gestel om selfs baie lae basklanke te hoor. Dit beteken mense sal maklik gesprekke in raserige klubs kan volg. Lees meer oor doofheid op bladsy 42.

Click hier en luister na gehoorgestremde Gerhard van der Merwe se verhaal.

Blinde honde kan weer sien

Eers het navorsers van Philadelphia daarin geslaag om drie blinde honde met nuwe geneterapie te laat sien.

Sowat 2 000 Suid-Afrikaners is blind weens LKA. Baie van die mense is van geboorte af blind. Die honde kon binne drie maande sien nadat die gesonde gene in hul retinas gespuit is.

Stuifmeel van doringbome kan tot asma lei. Maar met nuwe middels kan asma nou beter beheer word. Lees meer oor allergieë op bl. 100 in Pols nou beskikbaar.

10 SEKONDES
Dís hoe lank dit osoon (O3)-gas neem om met die tandbederf-bakterieë Streptococcus mutans en Lactobacillus in jou mond klaar te speel.

Dié behandelingstegniek raak nie net vir tot sestien weke van skadelike bakterieë ontslae nie, maar hou ook tandvleise gesond én voorkom slegte asem. Kinders hoef dalk nie weer ’n tandboor te hoor nie.

Hierdie inligting kom uit die September 2007 uitgawe van Pols tydskrif.