Om vir jou hond “mens-kos” te voer, mag sleg vir sy gesondheid wees. Hier is ’n paar van die gevare vir honde wat in alledaagse kos skuil:
-
Gaar of gekookte bene van pluimvee, vis of ander diere
Kan tot obstruksie of skeure in die verteringstelsel, asook pynlike hardlywigheid lei. Party bene kan in die tande of in die verhemelte van die dier vassit en skade veroorsaak. Dit is egter in die haak om elke nou en dan vir jou hond ’n rou murgbeen, wat jy by jou slagter gekoop het, te gee. -
Katkos
Bevat oor die algemeen te veel proteïne en vet. -
Sjokolade, koffie, tee en ander bronne van kafeïne
Die kafeïne en teobromien wat hierdie voedsel bevat, kan giftig wees en die ingewande, hart en senustelsel aantas. Wat vir ons ’n klein stukkie sjokolade is, kan proporsioneel heel groot vir ’n hond of kat wees. -
Vet-afsnysels
Om vir jou hond vet-afsnysels te voer, kan tot gewigstoename lei, met al die gesondheidsprobleme wat daarmee gepaard gaan (hart- en gewrigsprobleme). In sommige gevalle mag dit selfs pankreatitis by honde wat daartoe neig, veroorsaak. -
Druiwe en rosyntjies
Bevat ’n onbekende gifstof wat die niere kan beskadig. Druiwesaad-ekstrak veroorsaak egter geen probleme nie. -
Hop
’n Onbekende bestanddeel lei tot ’n gehyg, versnelde hartklop, verhoogde liggaamstemperatuur, stuiptrekkings en sterfte. -
Menslike vitamien-aanvullings wat yster bevat
Kan die wande van die spysverteringstelsel beskadig en giftig wees vir die ander organe, insluitende die lewer en niere. -
Groot hoeveelhede lewer
Kan vitamien A-vergiftiging veroorsaak, wat spiere en bene aantas. Dit kan ook koper-stoor-siekte veroorsaak, wat sonder uitsondering dodelik is. -
Marijuana
Kan die senustelsel onderdruk en vomering en hartklop-versteurings veroorsaak. -
Melk en ander suiwelprodukte
Party volwasse honde het nie genoeg van die ensiem laktase om die laktose in melk af te breek nie. Dit kan tot diarree lei. Daar is melkprodukte sonder laktose vir troeteldiere beskikbaar. -
Muwwe, bederfde of weggooikos
Kan verskeie gifstowwe bevat wat vomering en diarree veroorsaak en kan organe, veral die lewer, beskadig. -
Alkoholiese drank
Kan tot intoksikasie, koma en sterfte lei. -
Wilde sampioene
Mag toksiene bevat wat verskillende liggaamstelsels aantas, wat skok kan veroorsaak en tot sterfte kan lei. -
Uie en knoffel (rou, gaar of in poeiervorm)
Bevat sulfoksiede en disulfiede wat rooibloedselle kan beskadig en anemie veroorsaak. Knoffel is minder giftig as uie, en katte is meer sensitief daarvoor as honde. -
Aartappel, rabarber en tamatieblare; aartappel en tamatiesteeltjies
Bevat oksalate wat die spysvertering- senuwee- en urinêre stelsels kan aantas. -
Rou eiers
Bevat ’n ensiem wat avidien genoem word, wat die absorbering van biotien (’n B-vitamien) verlaag. Gereelde inname kan tot vel- en pelsprobleme lei. Rou eiers kan ook met Salmonella besmet wees. -
Rou vis
Kan tot ’n tiamien (’n B-vitamien) tekort lei, wat aptytverlies, stuiptrekkings en in ernstige gevalle sterfte kan veroorsaak. Dit is meer algemeen as hulle gereeld rou vis gevoer word. -
Sout
As dit in groot hoeveelhede ingeneem word, kan dit tot ’n elektroliet-wanbalans lei. -
Kos met baie suiker
Kan tot oorgewig en tandeprobleme lei. -
Tafel-oorskietkos (in groot hoeveelhede)
Tafel-oorskietkos is nie gebalanseer nie. Dit moet nooit meer as 10% van die dier se dieet uitmaak nie. Die vet moet van vleis afgesny word en ’n hond moet nooit gekookte bene kry nie. -
Tabak
Bevat nikotien wat die spysvertering- en senustelsels aantas. Dit kan ’n vinnige hartklop, bewusteloosheid, koma en sterfte veroorsaak. -
Suurdeeg
Kan uitsit en gas in die spysverteringstelsel produseer, wat pynlik is. -
Okkerneute
Veral die saaddoppe van swart okkerneute, aangesien dit obstruksie in die dermkanaal kan veroorsaak, asook stuiptrekkings as die doppe skimmel het. -
Suikervrye lekkers en ander items wat xylitol bevat
Dit kan tot lewerskade en sterfte lei.
- (Hilda Geyer/Health24, hersien Oktober 2010)
Hersien deur veearts Dr. Katja Bier.
Lees verder:
Jou troeteldier se gesondheid
Hoe om jou hond te versorg